26. INBRAKE EN KETTINGREAKSIES
§ Name van Britse huise: As jy na nuwe ontwikkelings hier gaan kry jy `n pragtige duursame brosjure met al die tipe huise daarin en hulle groottes. Elke huis het ook `n naam. Hier volg `n paar name: The Syon, The Wilton, The Ludlow, The Scotney, The Mansion House, The Frinstead, The Waltham, The Eynsford, The Petham, The Chartham, The Pembury, The Grovehurst, The Cobham, The Romney, The Throwley, The Chelsfield, The Hadlow, The Lydden, The Ospringe, The Lingham, The Wichling, The Lamberhurst. Nuwe ontwikkelings maak voorsiening vir 1,2,3,4 en 5 slaapkamer huise. Die 4 en 5 slaapkamerhuise is enorme huise en partykeer kry jy by `n 5 slaapkamerhuis sommer `n sesde kamer as `n bonus op die derde verdieping van die huis. Die ontwikkelings word so gedoen sodat daar nie `n arm buurt en `n ryk buurt is nie. Die ou wat net die een slaapkamer kan bekostig bly in dieselfde ontwikkeling as die ou wat die 5 slaapkamer huis kan bekostig. Dit moet `n pluspunt vir die Britse Sosialistiese stelsel wees! Slegs buitemure word met bakstene gebou. Binne-mure is ‘dry wall’ en vloere van plank. Jy moet ook ekstra betaal vir matte. Die praktyk is gewoonlik om `n aanbod te maak van `n bedrag wat so +/- £2000 pond minder is as wat die eienaar/ontwikkelaar vra. Die huis word dan beskou as ‘under offer’. Daarna moet kontrakte uitgeruil word en ………………………(baie geduld).
§ Kettingreaksie: As jy `n huis hier koop en jou huis moet ook verkoop word word daar gepraat van `n ‘chain’. Daar kan tot 8 of meer ouens in so `n ‘chain’ wees. Jy moet dus uitkyk vir `n huis wat geadverteer word met ‘NO CHAIN’. So weet jy dat jy hierdie huis kan koop sonder die nagmerrie dat die transaksie afhang van `n klomp ander ouens wat hulle huise moet verkoop. Agente hou gewoonlik van ouens wat by hulle opdaag en se hulle is eerste huiskopers of dat hulle huur. Ouens wat `n huis sien wat hulle wil koop kan hulle maklik in `n lang ‘chain’ bevind.
§ Geen veiligheidskomplekse of veiligheidswagte nie: Ons het nog nie so iets hier rond gesien nie. Huise word so gebou dat hulle deure op die straat oopmaak met geen veiligheidsmure nie. Baie huise het wel brand- en diefalarms. Inbrake is nogal `n probleem in sekere gedeeltes van Engeland. Geweld is nie gewoonlik betrokke by inbrake nie. Net nou en dan kom `n ou tannie `n inbreker by met haar kierie!
§ Getuie diens: In Engeland kry jy volunteers wat mense bystaan wat getuienis in die hof moet gee. Jy kan ook ‘n kursus doen wat jou leer om ‘n vriendelike gesig in die hof vir getuies te wees. Jy moet hoofsaaklik getuies wat baie op hulle senuwees is bystaan.
Vervolg…………………………………later.
Opgestel deur Anthonie Van Bosch.
